Gargarintxo Ludotekak Mankomunitateko Gizarte eta Kultura Eragileak, Gizarte Hezitzaileak eta Euskara Teknikariak bultzatuta 1997. urtean hasi zuen bere ibilbidea. Esteribarko haurrei elkartzeko leku bat eskaintzeko helburuarekin jaio zen eta hasierako urteetan Zubiriko Betargiko hirugarren solairuan kokatu zen. Bertan, hainbat material, jolas eta jostailu zeuden eta hezitzaile bat lagun, bailara osoko adin desberdinetako haurrak elkartzen ziren, bakoitza bere ludotekako karnetarekin sartzen zelarik. Garai hartan, ludoteka astean hiru egunez irekitzen zen ikasturtean zehar.

2003. urtean Esteribarko kiroldegia eraiki zen eta ludoteka bertara lekualdatu zen. Ludotekaren ordutegia zabalduz joan zen eta oporraldietan kanpaldiak antolatzen hasi ziren. Egun berezietan ere festa edota emanaldiak egiten ziren: urte amaierako festa, Olentzero, antzerki edota dantzaldiak…

2018. urtean ondoan zuen turismo bulegoa lekualdatzearekin batera, ludoteka handitu egin zen eta gaur egun duen itxura hartu zuen.

Aipatzekoak dira 2019. urtean, haurren banaketa demografikoari eta familien kontziliazio beharrei so eginez, kanpaldien antolaketan egindako aldaketak. Ordurarte udako kanpaldiak abuztuan izaten ziren, bi txandatan banaturik, 10:00etatik 14:00etara, Zubirin. 2019ko udan hainbat berrikuntza egin ziren. Alde batetik, astebeteko txandak eskaini ziren eta ordutegia zabaldu egin zen, sarrera eta irteera malgutuz. Bestalde, kanpaldiak Esteribarreko beste herri batzuetara ere zabaldu ziren, Eugi eta Ollokira, hain zuzen ere, eta jarduera desberdinak txertatu ziren, igeriketa ikastaroak, esate baterako. Horretaz gain, herri desberdinetako haurrak kanpaldietara eramateko garraio zerbitzua eskaintzen hasi zen. Guzti honek parte hartzaile kopuruaren igoera nabarmena suposatu zuen eta ikasturtean zehar antolatutako beste kanpaldietan ere aipatutako berrikuntza hauek txertatu ziren.

Guzti honetaz gain, 2020. urteaz geroztik, ikasturtean zeharreko ludoteka zerbitzua Ollokira ere zabaldu da. Gizarte-etxeko gela batean ludotekarentzako txokoa sortu da eta hezitzaile baten konpainian, Ollokiko haurrek bertan elkar ezagutzeko eta jolasteko aukera dute.

Gaur egun, Gargarintxo Ludoteka hasieran aipatutako elkartzeko lekua baino askoz gehiago dela esan dezakegu. Interakzio gune da, haurrek jokoaren bitartez ezagutzak, esperientziak eta ideiak partekatzeko lekua, elkar ezagutzeko tokia eta aisialdiaz askatasunez gozatzeko espazioa. Ludotekak haurren garapen integralean laguntzea du helburu eta elkartasuna, berdintasuna edota kooperazioa bezalako baloreak sustatzen ditu. Guzti hau haurren hizkuntza-eskakizunen arabera, euskaraz edota gazteleraz egiten da, betiere ludotekak euskararen normalizazioan eta hizkuntzaren erabilpenaren sustapenean duen garrantzia aintzat harturik.

Esteribarren oso errotuta dagoen zerbitzua da, asko eta asko baitira urte guzti hauetan zehar ludotekatik pasa diren haur eta gazteak, bakoitzak bere aletxoa utzi duelarik.

Jolas, dibertimendu eta adiskidantzaz beteriko ibilbidea jarraituz gure Gargarintxo 25 urte betetzera iritsi da. Hori ospatzeko 2022 urtean zehar hainbat ekimen burutu ziren: jaiak, argazki erakusketak, bideo proiekzioak… Gainera, logoa berritu eta gure pertsonaia jostariaren inguruko ipuintxo eta abestia sortu ziren, besteak beste.